Shkruan:
Xhafer Shatri
Më 9 nëntor 1989, Muri që ndante kryeqytetin e Gjermanisë dhe popullin e saj në dy shtete u shkërmoq brenda një nate.
Këtij akti që ishte edhe varrimi i Luftës së Ftohtë dhe hapja e një perspektive të re të popujve të shtypur nën thembrën e hekurt komuniste, i priu një lajm se autoritetet e Gjermanisë Lindore kishin vendosur që aty e tutje kalimi në anën tjetër të kufirit të bëhej pa leje paraprake, leje e cila deri atëherë jipej me pikatore.
Me t’u përhapur lajmi gjermanolindorët e mësyen Murin e urrejtjes me qyski, me dalta, me çekanë e me çka u qëlloi në dorë dhe nuk u ndalën deri sa e shkërmoqën të tërin.
Sot, copat e atij muri shiten në ankand.
Muri kishte filluar të ndërtohej me urdhërin e prijësit rus, Nikita Hrushçov, më 13 gusht 1961.
Me rënien e Murit të Berlinit lidhet edhe shkatërrimi i Jugosllavisë, shtetit që i ndau, i shtypi dhe i robëroi shqiptarët që nga viti i tmershëm 1878.
Rënia e Murit të Berlinit i ndanë dy epoka: dominimin e komunizmit (një Mesjete të tmershme ideologjike) mbi gati gjysmën e Evropës për gati gjysmë shekulli dhe shpartallimin e tij si të një kulle prej zalli.
Rënia e Murit e trandi dhe, pas dy vitesh e rrëxoi, njërin prej regjimeve më të egra komuniste, regjimin stalinist në Shqipëri.
Këto tri dekada në jetën e Kombit Shqiptar ishin një Rilindje e vërtetë, në të cilën u çlirua Kosova dhe u ringjall Shqipëria.
Për çudi 32 vjet më vonë, Rusia, ajo që urdhëroi ndërtimin e Murit të Urrejtjes, po e kërcënon serish dhe seriozisht Evropën dhe demokracitë Perëndimore.
Prania e Rusisë në Ballkan, dhe sidomos ndërsyemja e Serbisë në destabilizimin e shteteve fqinje është kthyer në një rrezik serioz për paqen në rajon.
Shkrimi është i mbrojtur, në rast kopjimi duhet të shënohet burimi dhe të mos ndryshohet përmbajtja e tij.
Be the first to comment